Tensionet mes Shtetet e Bashkuara të Amerikës dhe Kubë janë përshkallëzuar ndjeshëm ditët e fundit, ndërsa në ishull po shtohen frikërat për një konflikt të mundshëm me pasoja të rënda politike dhe ushtarake.
Sipas një analize të publikuar nga CNN, autoritetet kubane kanë nisur përgatitje emergjente dhe plane të mbrojtjes civile, ndërsa qytetarët po përballen me krizë ekonomike, mungesa ushqimore, mungesë karburanti dhe ndërprerje të vazhdueshme të energjisë elektrike.
Situata u tensionua edhe më shumë pas vizitës në Havana të drejtorit të CIA, John Ratcliffe, e cila u interpretua nga autoritetet kubane si një sinjal i fortë politik nga administrata amerikane.
Sipas raportimeve, Ratcliffe ka akuzuar Kubën për bashkëpunim me Rusinë dhe Kinën në instalimin e sistemeve të përgjimit dhe për veprime që cenojnë interesat amerikane në rajon.
Vetëm pak orë pas largimit të tij nga Havana, mediat ndërkombëtare raportuan se prokurorët federalë amerikanë po shqyrtojnë mundësinë e ngritjes së akuzave ndaj ish-presidentit kubanez Raul Castro.
Autoritetet kubane e kanë cilësuar situatën si një përshkallëzim të rrezikshëm, që mund të çojë në ndërprerje të plotë të marrëdhënieve diplomatike mes dy vendeve.
Presidenti kubanez Miguel Díaz-Canel deklaroi se vendi është “gati të japë jetën për revolucionin”, ndërsa mediat shtetërore kanë transmetuar pamje të stërvitjeve ushtarake dhe mobilizimit civil përballë një sulmi të mundshëm.
Në të njëjtën kohë, autoritetet kubane kanë shpërndarë udhëzime për qytetarët se si të përgatiten në rast të një “agresioni ushtarak hipotetik”, duke rekomanduar grumbullimin e ushqimeve dhe sendeve bazë për mbijetesë.
Megjithatë, deri më tani, administrata amerikane nuk ka deklaruar publikisht se po planifikon një operacion ushtarak ndaj Kubës.
