Këshilltari i Partisë Demokratike në Bashkinë e Tiranës, Ilir Alimehmeti, ka ngritur shqetësime serioze pas zjarrit në kompleksin Arlis, duke kërkuar një plan urgjent për sigurinë e fasadave të pallateve.
Sipas tij, rasti tregoi se edhe një zjarr i vogël mund të përhapet me shpejtësi dhe të kthehet në rrezik për jetën e banorëve, duke paralajmëruar për efektin “copycat” në raste të ngjashme.
Alimehmeti kritikoi mungesën e një plani të qartë nga institucionet, duke theksuar se duhet të ishte mbledhur menjëherë komisioni për emergjencat civile për të analizuar situatën dhe për të përcaktuar masa konkrete.
Ai ngriti gjithashtu shqetësime për mënyrën e shpërndarjes së ndihmës financiare për familjet e prekura, duke kundërshtuar trajtimin e njëjtë për të gjithë përfituesit.
“Nuk mund t’i trajtojmë të gjithë njësoj. Duhet të dihet kush ka më shumë nevojë, nëse ka fëmijë, të moshuar apo persona me probleme shëndetësore,” u shpreh ai.
Në të njëjtën kohë, Alimehmeti komentoi edhe çështjen e subvencionimit të karburantit, duke deklaruar se nuk ka një krizë reale të naftës, por sipas tij rritja e çmimeve në Shqipëri vjen si rezultat i ndërhyrjeve të një grupi të kufizuar interesash.
Deklaratat e tij vijnë në një moment kur siguria urbane dhe kostot e jetesës janë kthyer në tema kryesore të debatit publik në vend.
