Kreu i Partia Demokratike e Shqipërisë, Sali Berisha, deklaroi se raporti i Komisioni Evropian evidenton probleme serioze me korrupsionin dhe mbrojtjen politike të zyrtarëve të lartë në Shqipëri.
Në një deklaratë për mediat, Berisha u ndal veçanërisht tek zëvendëskryeministrja Belinda Balluku, për të cilën tha se raporti europian kërkonte heqjen e imunitetit “pa asnjë pengesë dhe me përparësi”.
Sipas tij, Balluku vijon të ushtrojë pushtet të plotë në qeveri, pavarësisht akuzave dhe debateve publike.
“Në këtë raport theksohet se heqja e imunitetit duhet të bëhet pa asnjë pengesë dhe me përparësi, ndërkohë që Lubi Balluku vazhdon të jetë zv/kryeministre në hije”, deklaroi Berisha.
Ai akuzoi gjithashtu qeverinë e Edi Rama se ka mbrojtur, sipas tij, aferat që lidhen me AKSHI, ndërsa shtoi se raporti i KE-së evidenton rënien e Shqipërisë në indeksin e korrupsionit.
Berisha komentoi edhe nismën rajonale “Ballkani i Hapur”, të cilën e cilësoi si një përpjekje për të dëmtuar procesin e integrimit europian të vendit.
Sipas tij, raporti europian ka kritikuar qartë këtë iniciativë, si dhe bashkëpunimin politik mes Ramës dhe presidentit serb Aleksandar Vučić.
“Në raport dënohet me forcë Ballkani i Hapur dhe nisma të tjera, si letra Vuçiç–Rama, si përpjekje për të minuar procesin e integrimit”, u shpreh Berisha.
Kryedemokrati pretendoi gjithashtu se qeveria ka fshehur, sipas tij, procese të rëndësishme që lidhen me integrimin europian të Shqipërisë.
