Presidenti amerikan Donald Trump ka hedhur poshtë një nga kërkesat kryesore të Iranit në kuadër të negociatave pas armëpushimit dyjavor, duke deklaruar se nuk do të lejohet pasurimi i uraniumit.
Në një postim në Truth Social, Trump theksoi se SHBA do të bashkëpunojë me Iranin, por nën kushte të qarta, përfshirë ndalimin e aktivitetit bërthamor dhe vendosjen e mbikëqyrjes së rreptë.
Ai shtoi se një pjesë e madhe e pikave të marrëveshjes janë tashmë dakordësuar dhe se diskutimet do të vijojnë edhe për çështje si tarifat dhe lehtësimi i sanksioneve.
Në të njëjtën kohë, Trump paralajmëroi masa të forta ndaj vendeve që furnizojnë Iranin me armë, duke deklaruar se ato do të përballen me tarifa doganore deri në 50% për mallrat që eksportojnë në SHBA.
Deklaratat e tij vijnë në një moment delikat, ndërsa palët kanë hyrë në një periudhë armëpushimi dhe pritet të zhvillojnë negociata për një marrëveshje më të gjerë.
