Policia e Durrësit ka finalizuar fazën e 11-të të operacionit policor të koduar “STORM”, duke goditur një rast të ushtrimit të prostitucionit në zonën e Shkëmbit të Kavajës.
Në pranga janë vënë dy shtetase nga Kolumbia, L. S., 26 vjeçe dhe M. P., 26 vjeçe, të cilat akuzohen për veprat penale “Prostitucion” dhe “Përshtatja e ambienteve për prostitucion”. Sipas hetimeve, ato kishin marrë me qira një apartament në këtë zonë dhe e kishin përshtatur për ushtrimin e aktivitetit të paligjshëm.
Gjithashtu, është proceduar penalisht në gjendje të lirë një shtetas shqiptar, E. M., 22 vjeç, banues në Burrel, i dyshuar për veprën penale “Prostitucioni”, në cilësinë e klientit.
Gjatë kontrollit në apartament, në cilësinë e provës materiale, policia sekuestroi:
- dy pasaporta të shtetaseve të huaja,
- shuma parash në lekë dhe në valutë,
- 3 aparate celularë,
- një bllok shënimesh,
- disa karta SIM.
Sipas njoftimit zyrtar, hetimi është ndjekur për disa javë me metoda speciale nga Seksioni për Hetimin e Trafiqeve, në bashkëpunim me Forcën e Posaçme Operacionale.
“Rezultoi se shtetaset kishin marrë me qira një apartament në zonën e Shkëmbit të Kavajës dhe e kishin përshtatur për ushtrimin e aktivitetit të prostitucionit”, bën me dije policia.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme ligjore.
