Çmimet e naftës dhe gazit në tregjet ndërkombëtare pësuan një rënie të ndjeshme pasi presidenti i SHBA-së, Donald Trump, deklaroi se konflikti me Iranin mund të jetë drejt përfundimit.
Nafta bruto, e cila të hënën arriti deri në 120 dollarë për fuçi për shkak të frikës nga ndërprerja e furnizimeve energjetike nga Lindja e Mesme, ra më pas në rreth 92 dollarë për fuçi pas komenteve të presidentit amerikan. Në të njëjtën kohë, edhe çmimet e gazit pësuan rënie, ndërsa bursat në Europë dhe Azi u rikuperuan.
Trump deklaroi se operacioni ushtarak ishte një “ekskursion i shkurtër” dhe se konflikti nuk pritet të zgjasë shumë. Ai paralajmëroi gjithashtu se nëse Irani përpiqet të bllokojë transportin e naftës përmes Ngushticës së Hormuzit, Shtetet e Bashkuara do të reagojnë shumë më fort.
Nga ana tjetër, drejtuesi i kompanisë shtetërore saudite të naftës Aramco, Amin Nasser, paralajmëroi për pasoja serioze për ekonominë globale nëse kjo rrugë strategjike mbetet e bllokuar. Sipas tij, rreth një e pesta e furnizimit botëror me naftë kalon përmes Ngushticës së Hormuzit.
Ai theksoi se rezervat globale të naftës janë në nivelin më të ulët të pesë viteve të fundit dhe çdo ndërprerje e gjatë e furnizimeve mund të shkaktojë pasoja të rënda në tregjet energjetike.
Ndërkohë, Garda Revolucionare e Iranit reagoi duke deklaruar se forcat iraniane nuk do të lejojnë eksportin e naftës nga rajoni nëse tensionet me SHBA-të vazhdojnë.
