Irani ka shpallur 40 ditë zie pas vrasjes së Udhëheqësit Suprem, Ali Khamenei, gjatë sulmeve të fundit të raportuara nga SHBA dhe Izraeli, sipas mediave shtetërore iraniane.
Presidenti Masoud Pezeshkian e cilësoi ngjarjen si “një krim të madh” dhe shpalli shtatë ditë pushim shtetëror, përveç periudhës 40-ditore të zisë kombëtare. Në Teheran dhe qytete të tjera janë raportuar grumbullime të mëdha qytetarësh që kanë dalë në rrugë për të vajtuar liderin.
Protesta janë shënuar në Shiraz, Yasuj dhe Lorestan, ndërsa pamje të transmetuara nga mediat shtetërore tregojnë mbështetës pranë kompleksit të Imam Reza në Mashhad, duke mbajtur ceremoni zie.
Ngjarja ka shkaktuar reagime edhe jashtë Iranit. Në Irak janë shpallur tri ditë zie kombëtare, ndërsa në Bagdad janë raportuar përplasje mes protestuesve dhe forcave të sigurisë në Zonën e Gjelbër.
Ndërkohë, raporte të tjera flasin edhe për raste festimesh sporadike në disa qytete iraniane.
Forcat e Gardës Revolucionare Islamike (IRGC) kanë paralajmëruar hakmarrje, ndërsa situata në rajon mbetet e tensionuar dhe me rrezik për përshkallëzim të mëtejshëm.
