Kreu i grupit parlamentar të Partisë Socialiste, Taulant Balla, iu përgjigj akuzave të opozitës gjatë seancës plenare në Kuvend, duke ironizuar debatet e brendshme në Partinë Demokratike lidhur me proceset zgjedhore dhe demokracinë e brendshme.
Duke komentuar deklaratat e Sali Berisha për raportin e Parlamentit Europian dhe standardet demokratike, Balla tha se opozita po përballet vetë me probleme të brendshme për mënyrën sesi organizon garat politike.
“Ankoheni që po ju vjedhin votat brenda partisë suaj”, deklaroi ai nga foltorja e Kuvendit.
Më tej, Balla përmendi rastin e Mereme Sela, duke kritikuar skualifikimin e saj nga gara dhe duke e lidhur këtë me mungesën e respektimit të barazisë gjinore brenda opozitës.
“Një grua si Meremja e shkretë kërkoi të kandidonte, e skualifikuat. Një kandidat nga gjinia tjetër do të bënte mirë”, u shpreh ai.
Debatet mes mazhorancës dhe opozitës në seancën plenare janë përqendruar kryesisht te raporti i fundit i European Parliament për Shqipërinë, çështjet e integrimit europian dhe funksionimi i institucioneve demokratike në vend.
