Reshjet intensive të shiut kanë futur një pjesë të madhe të Shqipërisë në situatë emergjente. Durrësi, Lezha, Vorë, Tirana, Gjirokastra dhe Kukësi janë goditur më fort, me përmbytje të gjera, rrëshqitje dherash, bllokim rrugësh dhe ndërprerje të përditshmërisë për mijëra qytetarë.
Durrës
Qyteti u zgjua nën ujë. Sistemi i kanalizimeve nuk përballoi prurjet, pusetat e bllokuara përkeqësuan situatën dhe qarkullimi u paralizua për orë të tëra. Zona e ish-Kënetës, paraburgimi, Spitalla dhe Durrësi i Ri mbeten problematike. Rreth 800 banesa janë të përmbytura ose të rrethuara nga uji; 180 banorë janë evakuuar dhe strehuar. Uji depërtoi në biznese, garazhe dhe ambiente publike; procesi mësimor u pezullua në të gjithë qarkun.
Lezhë & Kurbin
Prurjet e mëdha të lumenjve shkaktuan përmbytje të gjera: rreth 1010 ha tokë bujqësore në Lezhë dhe rreth 1500 ha në Kurbin janë nën ujë. Dhjetëra banesa u rrethuan nga uji, disa shkolla pezulluan mësimin. Shkarkimet nga kaskada e Drinit vijojnë të monitoruara.
Shkodër & veriperëndimi
Nivelet e lumenjve janë rritur, por aktualisht nën kuotat kritike. Hidrovoret janë në funksion. Ka zona me ndërprerje energjie dhe fshatra të bllokuara nga prurjet e përrenjve.
Mirditë & Dibër
Reshjet sollën rritje të niveleve të përroskave dhe rrëshqitje masive në akse nacionale, veçanërisht Burrel–Skuraj dhe zona pranë urës së Ulzës, duke rrezikuar qarkullimin.
Kukës
Rënie gurësh dhe inerte në disa segmente, sidomos në aksin Bajram Curri–Valbonë. Qarkullimi është rikthyer, por me kujdes të shtuar. Furnizimi me energji është pothuajse i plotë.
Elbasan
Aksi Elbasan–Gjinar paraqet vështirësi serioze nga uji dhe dherat në rrugë; lëvizja kryhet me shpejtësi të ulët dhe rrezik.
Vorë & Tiranë
Prezencë e lartë uji në disa blloqe banimi dhe biznese; ndërhyrje me pompa dhe mjete zjarrfikëse. Disa fluturime në aeroportin e Tiranës raportohen me vonesa për shkak të motit.
Paralajmërimi i IGJEUM
Instituti paralajmëron përkeqësim të situatës me reshje intensive, rrezik për përmbytje dhe rrëshqitje dherash. 8 zonat më problematike:
Shkodër, Kukës, Dibër, Lezhë, Durrës, Elbasan, Vlorë, Gjirokastër.
- Rritje e shpejtë e niveleve në lumenjtë kryesorë
- Rrezik vërshimesh të lumenjve malorë
- Rrëshqitje dherash në terrene të pjerrëta
- Në zona mbi 1000 m reshjet pritet të shndërrohen në dëborë
- Era e fortë në bregdet dhe det i trazuar
Autoritetet u bëjnë thirrje qytetarëve të shmangin lëvizjet e panevojshme, të ndjekin njoftimet zyrtare dhe të raportojnë çdo situatë rreziku. Situata mbetet dinamike dhe nën monitorim të vazhdueshëm.
