Deklarata e papritur e ish-kryeministrit Sali Berisha për vrasjet e 21 janarit ka ngjallur tronditje dhe indinjatë publike, por për juristin Romeo Kara, ky nuk është një moment reflektimi apo pendese, është një lëvizje e kalkuluar për t’i shpëtuar ndëshkimit. Me një analizë të thellë ligjore dhe morale, Kara rrëzon për gazetën “Sot” një për një çdo element të kësaj deklarate, duke e zhveshur Berishën nga maska e viktimës politike dhe duke e nxjerrë në pah si arkitektin e një krimi shtetëror të urdhëruar, të ekzekutuar dhe të mbuluar me vetëdije.
“Krim shtetëror, por pa dashje”, është formula që Berisha po përdor sot për të relativizuar një nga ngjarjet më të errëta të tranzicionit shqiptar, një frazë që për juristin nuk është gjë tjetër veçse një përpjekje e dëshpëruar për të shmangur zinxhirin penal të përgjegjësisë, që nis nga Kryeministria dhe përfundon te gishti që tërhoqi këmbëzën. Me argumente të pakundërshtueshme, Kara kërkon që kjo deklaratë të shërbejë si provë ligjore për rihapjen e hetimeve nga SPAK dhe përfundimisht, vendosjen e drejtësisë për katër jetët e pafajshme që ranë në Bulevardin Dëshmorët e Kombit.
