Partia Demokratike e Shqipërisë ka reaguar pas publikimit të raportit ndërkombëtar mbi nivelin e demokracisë, duke e cilësuar situatën në Shqipëri si një regres të rëndë politik.
Në deklaratën zyrtare, PD thekson se vendi është klasifikuar si “autokraci elektorale”, duke pretenduar se zgjedhjet nuk janë të lira dhe të ndershme dhe se institucionet funksionojnë vetëm në formë.
Sipas opozitës, përgjegjës për këtë situatë është kryeministri Edi Rama, të cilin e akuzon për përqendrim të pushtetit, ndikim mbi drejtësinë, presion ndaj mediave dhe përdorim të administratës për qëllime politike.
Në reagim thuhet se ky vlerësim ndërkombëtar përforcon shqetësimet e ngritura prej kohësh nga opozita dhe përbën një sinjal alarmi për procesin e integrimit europian të vendit.
PD e konsideron situatën si një përplasje me aspiratat e vendit për demokraci dhe zhvillim, duke theksuar se Shqipëria, sipas saj, është kthyer në një “demokraci në letër dhe autokraci në praktikë”.
Në përfundim, opozita u bën thirrje qytetarëve që të marrin pjesë në protestën e 22 marsit, duke e cilësuar atë si një moment të rëndësishëm për reagim qytetar dhe ndryshim politik.
