Prokuroria e Posaçme Kundër Korrupsionit dhe Krimit të Organizuar (SPAK) ka shpallur pretencën ndaj deputetit të Partisë Demokratike, Bardh Spahia, duke kërkuar dënimin e tij me gjobë në vlerën 700 mijë lekë.
Pretenca u paraqit gjatë seancës së zhvilluar në Gjykatën e Posaçme Kundër Korrupsionit dhe Krimit të Organizuar (GJKKO).
Sipas organit të akuzës, Spahia akuzohet për moszbatim të një vendimi gjyqësor gjatë kohës kur ushtronte detyrën e kryetarit të bashkisë.
Prokuroria pretendon se ai ka penguar ekzekutimin e një vendimi të formës së prerë të gjykatës që lidhej me drejtimin e Ujësjellësit.
Sipas SPAK, gjatë kohës kur ishte kryebashkiak, Spahia shkarkoi nga detyra drejtorin e Ujësjellësit, Mark Molla, dhe në vend të tij emëroi Arvit Bushatin.
Megjithatë, më pas gjykata kishte vendosur rikthimin në detyrë të Mark Mollës, vendim i cili sipas prokurorisë nuk u zbatua nga Spahia.
Për këtë arsye, SPAK ka kërkuar që deputeti demokrat të shpallet fajtor për veprën penale të “pengimit të ekzekutimit të vendimit gjyqësor” dhe të dënohet me gjobë.
