Kryeministri Edi Rama ka reaguar ndaj deklaratave të autoriteteve iraniane, të cilat hodhën poshtë pretendimet se kanë ndonjë rol në protestat e zhvilluara në Shqipëri lidhur me projektin në Zvërnec.
Më herët, zëdhënësi i Ministrisë së Jashtme të Iran i kishte cilësuar akuzat si të pabaza dhe kishte deklaruar se ato synojnë të shmangin debatin mbi shqetësimet e qytetarëve shqiptarë.
Në një reagim në rrjetin social X, Rama iu referua marrëdhënieve të tensionuara mes dy vendeve në vitet e fundit, duke përmendur sulmet kibernetike ndaj institucioneve shqiptare, për të cilat autoritetet shqiptare dhe partnerët ndërkombëtarë kanë akuzuar aktorë të lidhur me Iranin.
Kryeministri theksoi se Shqipëria do të vazhdojë të mbështesë vlerat demokratike dhe nuk do të tërhiqet nga qëndrimet e saj në politikën e jashtme.
“Shqipëria nuk do të kërkojë kurrë falje, nuk do të tërhiqet kurrë dhe nuk do të frikësohet kurrë”, shkroi Rama në reagimin e tij.
Ai mbrojti gjithashtu politikën e Shqipërisë për strehimin e kundërshtarëve të regjimit iranian, duke e lidhur atë me traditën shqiptare të mbrojtjes së njerëzve në nevojë.
Deklaratat vijnë në një moment kur protestat në Shqipëri dhe debati mbi projektin e Zvërnecit kanë marrë vëmendje të gjerë politike dhe mediatike. Deri tani nuk janë bërë publike prova konkrete që lidhin protestat me ndërhyrje të huaja, ndërsa autoritetet iraniane kanë mohuar kategorikisht çdo përfshirje.
Marrëdhëniet mes Shqipërisë dhe Iranit mbeten të tensionuara që prej vitit 2022, kur Tirana ndërpreu marrëdhëniet diplomatike me Teheranin pas akuzave për sulme kibernetike ndaj infrastrukturës shtetërore shqiptare.
