Protesta qytetare që nisi si kundërshtim ndaj projektit në Zvërnec po shoqërohet gjithnjë e më shumë me diskutime mbi organizimin politik dhe përfaqësimin e pakënaqësisë qytetare.
Në një intervistë televizive, studentja dhe aktivistja Laura Kërtalli deklaroi se lëvizja ka kaluar përtej kauzës fillestare dhe se një pjesë e protestuesve po shqyrtojnë mundësinë e krijimit të një alternative të re politike.
Sipas saj, pjesëmarrja në protestë është rritur vazhdimisht dhe ka treguar ekzistencën e një grupimi qytetar që kërkon përfaqësim të ndryshëm nga partitë tradicionale.
“Ne po përpiqemi të mobilizohemi dhe të ndërtojmë një forcë opozitare që nuk ndikohet nga partitë aktuale”, u shpreh Kërtalli.
Aktivistja tha se hapi i parë do të jetë organizimi i studentëve dhe diskutimi i ideve për të ardhmen e lëvizjes, ndërsa nuk përjashtoi mundësinë që në të ardhmen kjo energji qytetare të shndërrohet në një subjekt politik.
Sipas saj, objektivi afatgjatë është krijimi i një force me orientim demokratik, e cila të mund të konkurrojë edhe në zgjedhje.
Deklaratat vijnë në një moment kur protestat po shoqërohen me kritika jo vetëm ndaj qeverisë së drejtuar nga Edi Rama, por edhe ndaj partive tradicionale opozitare. Një pjesë e protestuesve kanë artikuluar kërkesa për rinovim të klasës politike dhe përfaqësim të ri qytetar.
Megjithatë, deri tani nuk është shpallur zyrtarisht krijimi i ndonjë partie apo lëvizjeje politike të re. Deklaratat përfaqësojnë qëndrimet e disa aktivistëve të përfshirë në protestë dhe mbetet për t’u parë nëse këto diskutime do të konkretizohen në një strukturë politike të organizuar.
