Protesta e 37-të kundër qeverisë është shoqëruar edhe këtë mbrëmje me pankarta dhe mesazhe të mbajtura nga pjesëmarrësit, të cilët kanë shprehur qëndrimet dhe kërkesat e tyre gjatë tubimit para Kryeministrisë.
Qytetarët, të mbledhur në bulevardin “Dëshmorët e Kombit”, kanë kërkuar dorëheqjen e kryeministrit Edi Rama, ndërsa në pankarta kanë renditur arsyet që, sipas tyre, i kanë nxjerrë në protestë, duke përmendur korrupsionin, keqqeverisjen dhe nevojën për llogaridhënie.
Mes mesazheve të shfaqura gjatë protestës ishin pankarta me mbishkrime si: “Rama në burg, Belinda në burg” dhe “Rruga për në BE kalon nga llogaridhënia”.
Pankartat dhe sloganet kanë shoqëruar fjalimet dhe brohoritjet e protestuesve, të cilët kanë deklaruar se do të vijojnë mobilizimin edhe në ditët në vijim, duke e cilësuar protestën si paqësore dhe të përqendruar te kërkesat e tyre për ndryshim politik.
