Deputeti i Partia Demokratike, Oerd Bylykbashi, ka reaguar lidhur me raportimet për zhytjen e disa godinave në projektin Durrës Marina, duke e cilësuar projektin një “kështjellë në rërë”.
Përmes një postimi publik, Bylykbashi deklaroi se “korrupsioni shqiptar prodhon çudira” dhe akuzoi qeverinë e Edi Rama për keqmenaxhim dhe favorizim të investitorëve privatë.
“Porti i ‘arabit’ asfiksoi portin e Durrësit. Projekti i marinës nuk njihet për postet e jahteve, por për 12 mijë apartamentet luksoze që po u zhyten themelet që me dy pallatet e para”, shkroi ai.
Sipas Bylykbashit, specialistët kishin paralajmëruar më herët për problemet teknike të themeleve dhe rrezikun që paraqiste ndërtimi në atë zonë.
“Specialistët e patën paralajmëruar me kohë që themelet nuk do të mbanin. Sot doli edhe IKMT-ja, që u detyrua të pranojë skandalin”, tha deputeti demokrat.
Ai pretendoi gjithashtu se shkalla e zhytjes mund të jetë më e madhe sesa ajo e raportuar zyrtarisht.
“Burimet e gazetarisë investigative thonë se zhytja është më e madhe se ajo që thotë IKMT-ja. Pra, jo vetëm skandali është më i rëndë, por edhe rreziku është më i madh”, u shpreh Bylykbashi.
Deputeti kritikoi edhe projektin e portit të ri në Porto Romano, duke thënë se qytetarët do të paguajnë qindra miliona euro nga taksat, ndërsa ende nuk ka afate të qarta për nisjen e punimeve.
“Planifikohen qindra miliona euro që t’u merren shqiptarëve me taksa për portin e ri në Porto Romano, por nuk dihet kur fillojnë punimet”, deklaroi ai.
Në fund, Bylykbashi akuzoi qeverinë për propagandë dhe korrupsion, duke thënë se “gënjeshtra del shpejt, ndërsa themelet në ujë zhyten shpejt”.
