Ministria e Infrastrukturës dhe Energjisë ka paralajmëruar qytetarët për mesazhe mashtruese që po qarkullojnë së fundmi në emër të institucionit dhe të Drejtoria e Përgjithshme e Shërbimeve të Transportit Rrugor.
Sipas njoftimit zyrtar, qytetarëve po u dërgohen SMS që përmbajnë linqe të dyshimta për gjoba apo pagesa, me qëllim mashtrimin dhe marrjen e të dhënave personale apo bankare.
Ministria u bëri thirrje qytetarëve që të mos klikojnë linket e dërguara dhe të mos japin asnjë informacion personal apo financiar.
“Tregoni kujdes. Mos klikoni linkun, mos jepni të dhëna personale apo bankare dhe fshijeni menjëherë mesazhin”, thuhet në reagimin e MIE.
Institucioni rikujtoi se faqet zyrtare shtetërore përfundojnë vetëm me domainin “.gov.al” dhe se çdo verifikim duhet të kryhet përmes platformave zyrtare si e-Albania.
MIE u kërkoi qytetarëve që ta shpërndajnë informacionin për të ndërgjegjësuar edhe përdorues të tjerë ndaj rasteve të mashtrimeve online.
