Kriza e fundit energjetike, e shkaktuar nga tensionet në Ngushticën e Hormuzit, ka vënë në qendër të vëmendjes rezervat strategjike të naftës që mbajnë vendet më të mëdha të botës.
32 vendet anëtare të International Energy Agency (IEA) kanë rënë dakord të lirojnë rreth 400 milionë fuçi naftë nga rezervat e tyre, në atë që konsiderohet ndërhyrja më e madhe e koordinuar në histori për stabilizimin e tregjeve globale të energjisë.
Rezervat strategjike janë depo emergjente që përdoren në raste krizash, si konflikte apo ndërprerje të furnizimit. Sipas IEA-s, vendet anëtare disponojnë mbi 1.2 miliardë fuçi në rezerva publike dhe rreth 600 milionë fuçi të tjera në sektorin privat.
Sipas të dhënave ndërkombëtare, vendet me rezervat më të mëdha janë:
Kina kryeson listën, me një vlerësim mbi 1.1 miliardë fuçi, edhe pse nuk publikon shifra zyrtare. Rezervat e saj janë të përqendruara kryesisht në zonat bregdetare lindore dhe jugore.
Shtetet e Bashkuara të Amerikës renditen ndër më të mëdhatë, me rreth 415 milionë fuçi në rezervat strategjike, të administruara nga Departamenti i Energjisë. Këto rezerva mund të mbulojnë rreth 200 ditë importe.
Japonia mban rreth 470 milionë fuçi, duke siguruar më shumë se 250 ditë konsum të brendshëm, ndërsa ka nisur tashmë përdorimin e tyre për të përballuar mungesat në treg.
Në Evropë, disa nga vendet kryesore me rezerva të konsiderueshme janë:
- Gjermania me rreth 177 milionë fuçi
- Spanja me rreth 150 milionë fuçi
- Franca me rreth 120 milionë fuçi
- Italia me rreth 76 milionë fuçi
Ndërkohë, Mbretëria e Bashkuar disponon rreth 68 milionë fuçi, të mjaftueshme për rreth 90 ditë konsum.
Këto rezerva po luajnë një rol kyç në stabilizimin e tregut global, ndërsa pasiguria për zhvillimet në Lindjen e Mesme vazhdon të ndikojë drejtpërdrejt në çmimet e energjisë dhe furnizimin global.
