Katër vite pas zhdukjes së Ervis Martinaj, gazetarja Klodiana Lala ka zbuluar detaje të reja lidhur me procesin gjyqësor për pasuritë e familjes Martinaj dhe bindjen që, sipas saj, është artikuluar për herë të parë publikisht nga familjarët: se Ervis Martinaj nuk jeton më.
Duke folur në News24, Lala tha se procesi i zhvilluar në GJKKO nuk lidhet me përgjegjësi penale ndaj Martinajt, por me sekuestrimin e pasurive nga SPAK.
Sipas saj, babai i tij, Mustafa Martinaj, ka dëshmuar në gjykatë se pasuritë familjare janë krijuar nga aktivitete të ligjshme biznesi, duke përfshirë këmbimin valutor, aktivitetin bankar dhe investime të tjera financiare ndër vite.
Gazetarja deklaroi se familja Martinaj pretendon se pasuritë burojnë nga një aktivitet biznesi rreth 30-vjeçar dhe se një pjesë e tyre mund të lirohen deri në përfundim të procesit gjyqësor.
“Për herë të parë në një gjykatë familja Martinaj artikuloi që Ervis Martinaj nuk jeton më”, deklaroi Lala, duke shtuar se edhe ajo vetë tashmë beson se Martinaj mund të jetë rrëmbyer dhe vrarë, pas mungesës totale të gjurmëve prej vitit 2022.
Sipas saj, fillimisht kishte dyshime se zhdukja mund të ishte e qëllimshme, siç ndodh shpesh me figura të botës së krimit për shkak të konflikteve apo rrezikut ndaj jetës së tyre. Por fakti që nuk është gjetur asnjë shenjë apo komunikim prej tij prej vitesh ka ndryshuar perceptimin mbi fatin e tij.
Lala përshkroi gjithashtu profilin familjar të Martinajt, duke theksuar se ai vinte nga një familje e njohur dhe ekonomikisht e konsoliduar nga zona e Fushë-Kuqes, me origjinë nga Mali i Zi.
Ajo tha se Ervis Martinaj kishte studiuar në Itali dhe nuk ishte një person që vinte fillimisht nga bota e krimit, por sipas saj u përfshi më vonë në konfliktet e forta që lidhen me lojërat e fatit dhe krimin e organizuar.
Gazetarja ngriti dyshime edhe mbi dijeninë që mund të ketë ish-efektivi Jeton Lami lidhur me zhdukjen e Martinajt.
“Unë mendoj që Jeton Lami e di të vërtetën”, deklaroi ajo, duke kujtuar gjithashtu se Lami ishte takuar edhe me Brilant Martinaj pak para atentatit ku ky i fundit mbeti i vrarë bashkë me dy persona të tjerë.
Ervis Martinaj u raportua i zhdukur në vitin 2022 dhe që prej asaj kohe autoritetet shqiptare nuk kanë dhënë një përgjigje përfundimtare mbi fatin e tij. Hetimet për çështjen vijojnë ende.
