Autoritetet zvicerane kanë konfirmuar zyrtarisht shkakun e zjarrit tragjik që shpërtheu në një lokal nate në resortin e skive Crans-Montana, ku humbën jetën 47 persona dhe mbi 100 të tjerë mbetën të plagosur.
Sipas kryeprokurores së kantonit Valais, hetimet paraprake kanë vërtetuar se zjarri nisi nga fishekzjarre ose flakadanë të vendosur në shishe shampanje, të përdorura gjatë festimeve të ndërrimit të viteve.
“Në këtë fazë të hetimit, gjithçka tregon se zjarri u shkaktua nga fishekzjarre të vendosura në shishe shampanje, të cilat u afruan tepër pranë tavanit. Flakët u përhapën shumë shpejt, brenda pak çastesh,” deklaroi ajo.
Përhapje e menjëhershme e flakëve
Zjarri u përhap me shpejtësi rrufeje, i favorizuar nga prania e materialeve sintetike izoluese në tavanin e ulët të lokalit. Këto materiale dyshohet se ishin shumë të ndezshme dhe e përkeqësuan ndjeshëm situatën, duke e bërë të pamundur reagimin në kohë nga personeli dhe klientët.
Viktima të mitura dhe identifikim i vështirë
Ekipet e mjekësisë ligjore vijojnë punën në vendngjarje, ndërsa raportohet se disa prej të plagosurve, përfshirë edhe të mitur rreth 15 vjeç, po trajtohen për djegie të rënda të shkallës së tretë.
Autoritetet paralajmërojnë se procesi i identifikimit të viktimave mund të zgjasë ditë apo edhe javë, për shkak të gjendjes së rëndë të trupave dhe dëmtimeve të shkaktuara nga flakët.
Në fokus hetimor: siguria dhe përgjegjësitë
Hetimet tashmë janë përqendruar në funksionimin e sistemeve të alarmit dhe kundër zjarrit, daljet emergjente, kapacitetin real të lokalit dhe respektimin e standardeve të sigurisë.
Në kuadër të hetimit, pritet të merren në pyetje edhe pronarët e lokalit, për të përcaktuar nëse ka pasur neglizhencë apo shkelje të rënda të rregullave të sigurisë.
Tragjedia në Crans-Montana konsiderohet një nga ngjarjet më të rënda të viteve të fundit në Zvicër, duke ngritur pikëpyetje serioze mbi sigurinë në ambientet e argëtimit gjatë eventeve masive.
