Tensionet tregtare mes Shtetet e Bashkuara të Amerikës dhe Bashkimi Evropian janë rritur ndjeshëm, pasi presidenti amerikan Donald Trump paralajmëroi vendosjen e tarifave prej 25% për automjetet e importuara nga Europa.
Reagimi i Brukselit ishte i menjëhershëm. Zëdhënësi i Komisionit Evropian, Olof Gill, theksoi se BE mbetet e përkushtuar ndaj një marrëdhënieje të qëndrueshme transatlantike, por paralajmëroi se çdo veprim i njëanshëm nga SHBA që bie ndesh me marrëveshjet ekzistuese do të marrë përgjigje.
“Ne i mbajmë të gjitha opsionet të hapura për të mbrojtur interesat evropiane”, deklaroi ai, duke shtuar se BE është në kontakt të vazhdueshëm me autoritetet amerikane për të kërkuar qartësi mbi angazhimet e tyre.
Vendimi i paralajmëruar nga Trump shihet si një përmbysje e marrëveshjes tregtare të arritur më parë mes dy palëve, e cila parashikonte ulje tarifash dhe bashkëpunim ekonomik në disa sektorë strategjikë. Marrëveshja përfshinte edhe angazhime të mëdha financiare, si blerje energjie nga SHBA dhe investime të ndërsjella në industri kyçe.
Megjithatë, nëse tarifat e reja hyjnë në fuqi, BE pritet të përdorë një sërë instrumentesh për kundërpërgjigje. Mes tyre janë tarifat hakmarrëse për produktet amerikane, kufizime në aksesin e kompanive amerikane në tregun evropian dhe përdorimi i mekanizmave si Instrumenti Kundër Shtrëngimit.
Ekspertët paralajmërojnë se një përshkallëzim i tillë mund të godasë rëndë industrinë e automobilave dhe të ndikojë në ekonominë globale, duke rritur rrezikun e një lufte të re tregtare mes dy blloqeve më të mëdha ekonomike në botë.
