Autoritetet italiane kanë finalizuar një operacion të gjerë kundër financimit të terrorizmit, duke arrestuar nëntë persona të dyshuar për mbështetje financiare të një organizate të shpallur terroriste nga Bashkimi Evropian. Gjatë aksionit janë sekuestruar pasuri dhe fonde me vlerë mbi 8 milionë euro.
Sipas hetimeve, paratë ishin mbledhur kryesisht përmes shoqatave të ashtuquajtura bamirëse, të cilat pretendonin se ndihmonin civilë në nevojë, por fondet përfundonin te struktura të lidhura me organizatën terroriste. Një pjesë e tyre dyshohet se përdorej për mbështetjen e familjeve të personave të përfshirë në sulme apo të dënuar për aktivitete terroriste.
Operacioni u koordinua nga strukturat italiane kundër mafias dhe terrorizmit në qytetin e Gjenovës, në bashkëpunim me autoritete evropiane. Mes të arrestuarve ndodhet edhe presidenti i Shoqatës së Palestinezëve në Itali, i identifikuar nga hetuesit si figurë kyçe e rrjetit të dyshuar të financimit.
Kryeministrja italiane e ka cilësuar aksionin si një goditje të fortë ndaj financimit të terrorizmit dhe një hap të rëndësishëm për sigurinë kombëtare dhe evropiane. Ndërkohë, disa aktivistë pro-palestinez kanë reaguar me kritika, duke i konsideruar arrestimet si kriminalizim të solidaritetit me popullsinë palestineze.
