Deputeti i Partisë Socialiste Erion Braçe ka reaguar pas protestës së opozitës në Tiranë, duke komentuar edhe qëndrimin e Ambasada Gjermane që dënoi dhunën.
Në një postim publik, Braçe ironizoi faktin që gjatë protestës, ku u hodhën molotovë dhe mjete piroteknike drejt institucioneve dhe policisë, disa protestues mbanin flamuj gjermanë.
“Dekori i zjarrit paska qenë me flamuj gjermanë, por gjermanët qenkan kundër dhe ashpër madje”, shkruan ai, duke i bërë thirrje qytetarëve të “lexojnë Gjermaninë”.
Reagimi i tij vjen pasi Ambasada Gjermane theksoi se protesta është një e drejtë demokratike, por dënoi pa ekuivok dhunën ndaj personave dhe objekteve, duke kërkuar distancim nga aktet e dhunshme.
Protesta e zhvilluar më 22 mars në Tiranë u shoqërua me tensione, përplasje me policinë dhe përdorim të gazit lotsjellës, ndërsa çështja vijon të shkaktojë reagime politike nga të dyja palët.
