Kryetari i Partisë Demokratike, Sali Berisha, ka akuzuar qeverinë për fshehje të qëllimshme të mesazheve ndërkombëtare që, sipas tij, ekspozojnë lidhjet e pushtetit me krimin e organizuar. Në një konferencë për mediat, Berisha deklaroi se kryetari i Kuvendit, Niko Peleshi, ka censuruar mesazhin e Departamentit Amerikan të Shtetit, të përcjellë gjatë një takimi zyrtar në SHBA.
Sipas Berishës, mesazhi i DASH ishte i qartë dhe i drejtpërdrejtë, duke theksuar nevojën për luftë kundër organizatave kriminale transnacionale, çka sipas tij nënkupton rrezikun që kartelet shqiptare të drogës përbëjnë për vendet e tjera. Ai akuzoi Peleshin se e ka hequr këtë pjesë nga komunikimi publik, duke e quajtur veprimin akt censure dhe bashkëpunim në krim.
Berisha deklaroi se Edi Rama “po luan me fatin e vendit dhe të çdo shqiptari” vetëm për të mbrojtur, sipas tij, krimet dhe aferat korruptive të qeverisë. Ai u bëri thirrje qytetarëve të reagojnë, duke theksuar se rruga e vetme për ndryshim është një kryengritje paqësore.
“10 shkurti është dita e çdo qytetari, dita e dinjitetit, guximit dhe vendosmërisë për të marrë fatin në duar,” u shpreh Berisha, duke shtuar se qeveritarët aktualë nuk kanë asnjë interes tjetër përveç pasurimit personal përmes vjedhjeve.
Në përfundim, kreu i PD-së akuzoi mazhorancën se po manipulon informacionin publik dhe po fsheh të vërtetat që vijnë nga partnerët ndërkombëtarë, duke rrezikuar seriozisht interesat e Shqipërisë dhe besimin e qytetarëve.
