Periudha e festave sjell gëzim dhe bashkim familjar, por sipas mjekëve mund të shoqërohet edhe me rreziqe të shtuara për shëndetin e zemrës. Të dhënat e Shoqatës Amerikane të Kardiologjisë tregojnë se nga Krishtlindjet deri në Vitin e Ri regjistrohet numri më i lartë i rasteve të infarktit gjatë vitit.
Ekspertët shpjegojnë se gjatë festave ndryshon rutina e përditshme: rritet konsumi i ushqimit dhe alkoolit, ulet aktiviteti fizik, shtohet stresi emocional dhe financiar, ndërsa shumë persona priren të neglizhojnë shenjat paralajmëruese të trupit, duke i shtyrë kontrollet mjekësore për “pas festave”.
Presidenti i shoqatës thekson se këta faktorë, të kombinuar, krijojnë një ngarkesë të madhe për zemrën, veçanërisht te personat me probleme kardiovaskulare, tension të lartë apo diabet.
Megjithatë, me disa hapa të thjeshtë parandalues, festat mund të shijohen pa rrezikuar shëndetin:
- Njihni shenjat e infarktit: Dhimbja në gjoks është simptoma më e shpeshtë, por mund të shoqërohet edhe me lodhje të fortë, vështirësi në frymëmarrje, të përziera, djersitje apo zbehje. Nëse shfaqen, kërkoni menjëherë ndihmë mjekësore.
- Mos e teproni me ushqimin dhe alkoolin: Zgjidhni porcione të moderuara, ushqime më të lehta dhe kufizoni kripën.
- Menaxhoni stresin: Përpiquni të ruani qetësinë dhe të mos mbingarkoheni emocionalisht apo financiarisht.
- Qëndroni aktivë: Edhe ecja e lehtë ndihmon në mbajtjen e zemrës aktive.
- Mos neglizhoni mjekimet: Matni rregullisht tensionin dhe merrni ilaçet sipas këshillës së mjekut.
Ekspertët theksojnë se kujdesi për zemrën gjatë festave nuk do të thotë heqje dorë nga gëzimi, por zgjedhje më të mençura për të hyrë në vitin e ri me shëndet më të mirë.
