Asociacioni i Gazetarëve të Shqipërisë (AGSH) ka përshëndetur vendimin e Gjykatës Kushtetuese që e cilësoi antikushtetues bllokimin e platformës TikTok nga qeveria shqiptare.
Në një reagim zyrtar, AGSH thekson se Kushtetuesja pranoi pjesërisht kërkesën e paraqitur nga ky asociacion së bashku me Rrjetin Ballkanik për Gazetari Investigative (BIRN Albania), duke e konsideruar vendimin një zhvillim të rëndësishëm për mbrojtjen e lirisë së shprehjes.
Sipas Gjykatës Kushtetuese, zbatimi i vendimit të Këshillit të Ministrave për bllokimin e përkohshëm të TikTok ka sjellë cenim të lirisë së shprehjes dhe të lirisë së shtypit.
AGSH thekson se ndërprerja e aksesit në një platformë komunikimi publik përbën kufizim të këtyre lirive themelore dhe duhet të bazohet gjithmonë në ligj, të jetë proporcional dhe i justifikuar nga një interes publik i domosdoshëm.
“Asociacioni i Gazetarëve të Shqipërisë mirëpret vendimin e Gjykatës Kushtetuese, i cili përbën një zhvillim të rëndësishëm për mbrojtjen e lirisë së shprehjes, pluralizmit të informacionit dhe standardeve demokratike në vend”, thuhet në reagim.
Sipas organizatës, qëllimi i nismës ligjore nuk ishte mbrojtja e një platforme të caktuar, por mbrojtja e parimit kushtetues të lirisë së shprehjes dhe të drejtës për informim, të cilat konsiderohen shtylla themelore të demokracisë dhe të punës së gazetarëve.
