Qytetarë dhe aktivistë janë mbledhur edhe këtë të premte në sheshin “Skënderbej”, duke vijuar protestat që zhvillohen prej 34 ditësh në Tiranë.
Tubimi nisi rreth orës 19:00, ku pjesëmarrësit u panë me pankarta dhe flamuj në duar. Sipas organizatorëve, pas një qëndrimi të shkurtër në shesh, protestuesit do të marshojnë drejt godinës së Kryeministrisë, ku do të paraqesin kërkesat e tyre dhe më pas do të vijojnë marshimin në disa rrugë të kryeqytetit.
Protestat nisën fillimisht si kundërshtim ndaj projekteve të zhvillimit në zonën e Zvërnecit, por më pas u zgjeruan duke përfshirë edhe kërkesa të tjera politike.
Organizatorët kanë bërë publike më herët një platformë me disa kërkesa, ndër të cilat përfshihen dorëheqja e kryeministrit dhe e qeverisë, si edhe krijimi i një qeverie teknike tranzitore, jopartiake, me mandat 12-mujor.
Autoritetet nuk kanë raportuar incidente në momentet e para të grumbullimit të protestuesve.
