Protesta e ditës së 34-të kundër qeverisë mblodhi sërish qytetarë dhe aktivistë në sheshin “Skënderbej” në Tiranë, të cilët më pas marshuan drejt Kryeministrisë, duke kërkuar dorëheqjen e kryeministrit dhe ndryshime politike.
Pjesëmarrësit mbanin pankarta dhe flamuj kombëtarë, ndërsa dënuan edhe përplasjet mes protestuesve dhe Policisë së Shtetit gjatë tubimit të një dite më parë pranë Kuvendit.
Mes protestuesve ishte edhe një emigrant i ardhur nga Greqia, i cili deklaroi se kishte udhëtuar së bashku me një grup bashkatdhetarësh për t’iu bashkuar protestës.
“Jo vetëm unë, por edhe një grup emigrantësh nga Athina kemi ardhur për të qenë pjesë e kësaj proteste. Jemi të revoltuar dhe besojmë se ka ardhur momenti për ndryshim,” u shpreh ai.
Duke komentuar deklaratat politike që kanë përmendur ndikime të huaja në protesta, protestuesi tha me ironi:
“Po, unë jam ai ‘agjenti grek’ për të cilin flitet. Ne jemi qytetarë të zhgënjyer që kërkojmë dorëheqjen e kryeministrit.”
Ai shtoi se, sipas tij, vendi ka nevojë t’i japë fund tranzicionit politik dhe bëri thirrje për ndryshim përmes mjeteve demokratike.
Protesta vijoi me marshim në rrugët e kryeqytetit, ndërsa organizatorët kanë deklaruar se tubimet do të vazhdojnë edhe në ditët në vijim.
