Analisti Enton Abilekaj ka komentuar protestat e vazhdueshme qytetare në Tiranë, duke i cilësuar ato si një fenomen të pazakontë shoqëror dhe politik, ku qytetarët jo vetëm marrin pjesë në tubime, por zgjedhin të qëndrojnë në rrugë deri në orët e vona të natës.
Sipas Abilekajt, protesta ka krijuar një komunitet të ri qytetar, ku njerëz me të njëjtat shqetësime dhe pritshmëri po gjejnë njëri-tjetrin dhe po ndajnë të njëjtën ndjenjë pakënaqësie ndaj realitetit që po përjetojnë.
“Është e pazakontë të shohësh njerëz që nuk largohen pas protestës. Ata qëndrojnë me orë të tëra në shesh, sepse ndiejnë se kanë gjetur njëri-tjetrin. Kanë kuptuar se nuk janë të vetmuar në shqetësimet e tyre dhe se mund të kërkojnë ndryshim së bashku”, u shpreh ai.
Duke komentuar reagimet e kryeministrit Edi Rama ndaj protestave, Abilekaj tha se strategjia e ndjekur nga kreu i qeverisë synon të largojë vëmendjen nga thelbi i pakënaqësisë qytetare dhe ta zhvendosë debatin drejt performancave mediatike dhe komunikimit simbolik.
Sipas analistit, protesta nuk është produkt i organizimit politik të opozitës, por rezultat i drejtpërdrejtë i mënyrës së qeverisjes gjatë viteve të fundit.
“Kjo protestë nuk është krijuar nga askush tjetër përveç vetë qeverisjes. Pakënaqësia që shohim sot është ndërtuar gjatë viteve dhe lidhet me mënyrën se si janë trajtuar çështje si zhvillimi urban, mjedisi, ekonomia dhe perspektiva e të rinjve,” deklaroi ai.
Abilekaj kritikoi gjithashtu modelin e zhvillimit të ndjekur në vend, duke argumentuar se rritja intensive e ndërtimeve nuk ka sjellë përfitime të prekshme për shumicën e qytetarëve.
Ai theksoi se shumë njerëz ndihen të përjashtuar nga zhvillimi ekonomik dhe për këtë arsye po shprehin hapur pakënaqësinë e tyre në rrugë.
“Kur qytetarët shohin se kostoja e jetesës rritet, çmimet e banesave rriten dhe mundësitë për një jetë më të mirë zvogëlohen, atëherë lind ndjenja e revoltës. Kjo është arsyeja pse protesta vazhdon të zgjerohet dhe të tërheqë pjesëmarrës të rinj çdo ditë,” tha ai.
Sipas Abilekajt, zhvillimet e fundit tregojnë se protesta ka kaluar kufijtë e një reagimi të momentit dhe është shndërruar në një shprehje më të gjerë të pakënaqësisë qytetare ndaj modelit aktual të qeverisjes.
