Kryetari i Partia Demokratike e Shqipërisë, Sali Berisha, mbajti një fjalim me tone të forta politike në Kuvendin Kombëtar, ku foli për sfidat e Partisë Demokratike, betejat e viteve të fundit dhe objektivat e opozitës për të ardhmen.
Në fjalën e tij, Berisha pranoi se gjatë karrierës së gjatë politike ka bërë gabime, por theksoi se forca e një lideri dhe e një partie qëndron te aftësia për t’i korrigjuar ato dhe për të vijuar përpara.
“Sa herë rrëzohemi, ngrihemi përsëri”, deklaroi ai para delegatëve, duke e cilësuar Partinë Demokratike si një forcë politike të ndërtuar mbi vlera, ideale dhe qëndresë.
Berisha falënderoi gjithashtu përfaqësuesit e partive simotra europiane dhe amerikane të pranishëm në Kuvend, duke vlerësuar mbështetjen ndërkombëtare për demokratët shqiptarë dhe bashkëpunimin e gjatë me forcat konservatore në Europë dhe SHBA.
Kreu i PD-së përdori edhe tone të ashpra ndaj qeverisë, duke deklaruar se opozita do të vazhdojë betejën politike kundër asaj që ai e konsideron model të dështuar qeverisjeje. Ai u shpreh i bindur se demokratët do të rikthehen më të fortë dhe do të vazhdojnë misionin e tyre politik.
Fjalimi i Berishës u prit me duartrokitje nga delegatët e Kuvendit Kombëtar, i cili po zhvillohet në Pallatin e Kongreseve dhe pritet të përcaktojë drejtimin organizativ dhe politik të Partisë Demokratike për vitet e ardhshme.
