Presidenti i Serbia, Aleksandar Vučić, ka deklaruar se mund të japë dorëheqjen së shpejti, në një moment tensionesh të forta politike dhe protestash antiqeveritare në vend.
Gjatë një deklarate për mediat nga Pekin, ku ndodhet për një vizitë zyrtare, Vuçiç tha se mandati i tij “po i afrohet fundit” dhe se nuk synon ta zgjasë artificialisht atë.
“Është e mundur që së shpejti të paraqes dorëheqjen time”, deklaroi presidenti serb.
Vuçiç komentoi edhe protestën e zhvilluar në sheshin Slavija në Beograd, të organizuar nga studentë dhe grupe opozitare, duke minimizuar pjesëmarrjen dhe ndikimin e saj politik.
Sipas tij, protestat ishin “pa përmbajtje të menduar mirë” dhe “jo veçanërisht të mëdha”, ndërsa akuzoi organizatorët për incidentet që ndodhën pas përfundimit të tubimit.
Presidenti serb tha se shërbimet e sigurisë kishin vlerësuar pjesëmarrjen mes 30 mijë dhe 34 mijë protestuesve, megjithëse sipas tij shifrat reale mund të kenë qenë më të ulëta.
Në të njëjtën kohë, Vuçiç njoftoi se Partia Progresive Serbe do të organizojë tubime politike nga 26 deri më 28 qershor, duke theksuar se mesazhet politike do të kenë më shumë rëndësi sesa numri i pjesëmarrësve.
Deklaratat e tij vijnë në një klimë të tensionuar politike në Serbi, ku protestat studentore dhe opozitare kundër korrupsionit dhe qeverisë janë shtuar muajt e fundit.
