Pozitat e Belinda Ballukut, për të cilën SPAK ka kërkuar autorizim për arrestim, vijojnë të rëndohen me publikimin e materialeve të reja nga dosja hetimore. Janë zbardhur komunikime të tjera mes zv.kryeministres dhe ish-kreut të ARRSH-së, Evis Berberi, të cilat hedhin dritë mbi mënyrën e ndjekjes së disa procedurave të prokurimit.
Sipas dosjes, nga telefoni “BlackBerry” i sekuestruar i Evis Berberit, janë zbuluar biseda të zhvilluara më 24 gusht 2021. Në një nga mesazhet, Belinda Balluku i shkruan vartësit të saj se ka zhvilluar një takim me biznesmenin Ramë Geci, me kërkesë të drejtpërdrejtë të kryeministrit.
Në komunikimin e orës 13:49, Balluku shkruan:
“KM më kërkoi të takoj Ram Gecin”.
Pak minuta më pas, Evis Berberi i përgjigjet duke sqaruar se e kishte takuar edhe vetë biznesmenin në kantier, duke bërë një inspektim në zonën e punimeve. Biseda vijon me diskutime mbi projektin dhe vlerën financiare të tij.
Në një tjetër mesazh, Balluku pyet:
“Në PR do e çojmë këtë, them unë. Sa është PR?”
Ndërsa Berberi përgjigjet:
“15 ml, rreth diku te 10 ml euro pa TVSH, 15 miliardë lekë”.
Sipas SPAK, këto komunikime lidhen drejtpërdrejt me procedurën e prokurimit të Autoritetit Rrugor Shqiptar për projektin “Ndërtim rruga Porto Romano – Durrës, Loti 3 (vazhdimi)”. Procedura është shpallur më 15 shtator 2021 dhe më pas, në Buletinin e Agjencisë së Prokurimit Publik të datës 22 nëntor 2021, është publikuar njoftimi për vlerësimin e ofertave.
Nga të dhënat zyrtare rezulton se fituese e tenderit është shpallur shoqëria “Geci” sh.p.k., e cila ka si ortak të vetëm dhe administrator shtetasin Ramë Geci. Kontrata është lidhur mes ARRSH-së dhe kësaj shoqërie për ndërtimin e segmentit rrugor në zonën e Porto Romanos në Durrës.
SPAK e konsideron këtë komunikim dhe mënyrën e ndjekjes së procedurës si pjesë të dyshimeve për ndërhyrje të paligjshme në proceset e prokurimit, çka ka çuar në rëndimin e akuzave ndaj Belinda Ballukut, e cila tashmë po hetohet për disa dosje të mëdha infrastrukturore.
