Të paktën 20 persona kanë humbur jetën pasi cikloni i fuqishëm Gezani goditi Madagaskarin, duke shkaktuar dëme të mëdha materiale dhe kaos në disa zona të vendit.
Stuhia u përplas të martën në portin kryesor Toamasina, qyteti i dytë më i madh në vend, me erëra që arritën deri në 250 km/orë. Sipas autoriteteve të menaxhimit të fatkeqësive, shumica e viktimave humbën jetën si pasojë e shembjes së banesave.
Zona e goditur mbeti pa energji elektrike pasi linjat e tensionit u këputën, ndërsa pemët u shkulën dhe çatitë e shtëpive u rrëzuan. Organizatat humanitare raportuan se rreth 90% e çative në disa lagje janë dëmtuar plotësisht ose pjesërisht.
Dhjetëra persona të plagosur janë evakuuar, ndërsa qindra banorë janë zhvendosur në strehimore emergjente. Banorët e zonës përshkruan skena paniku dhe erëra të pazakonta në forcë.
Gezani është cikloni i dytë që godet Madagaskarin këtë vit, pas stuhisë tropikale Fytia, e cila shkaktoi 14 viktima dhe zhvendosi mbi 31 mijë persona. Sezoni i cikloneve në rajon zgjat nga nëntori deri në prill dhe shpesh sjell stuhi të fuqishme në ishullin e Oqeanit Indian.
