Gjykata e Posaçme Kundër Korrupsionit dhe Krimit të Organizuar (GJKKO) ka shpallur fajtorë pesë persona të akuzuar për korrupsion aktiv në zgjedhje, lidhur me zgjedhjet vendore të vitit 2023 në Bashkinë Rrogozhinë.
Në total, trupi gjykues dënoi me 6 vite e 6 muaj burg ish-deputetin Engjëll Cara, si edhe Limon Shala, Fatmir Thaçi, Florant Saraçi dhe Shkëlqim Hoxha, ish-kandidat për kryetar bashkie nga radhët e Partisë Demokratike. Për shkak të gjykimit të shkurtuar, dënimet u ulen dhe u konvertuan në shërbim prove dhe punë në interes publik.
Skema e manipulimit të votës
Sipas hetimeve të SPAK, të pandehurit vepruan në bashkëpunim duke ofruar bileta udhëtimi të parapaguara për qytetarë të ndryshëm, me qëllim që të votonin në favor të Shkëlqim Hoxhës. Skema është dokumentuar në 64 raste konkrete, të konsideruara prova kyçe në procesin penal.
Ngjarja lidhet me zgjedhjet e përsëritura të 23 korrikut 2023 në Rrogozhinë, ku fitorja e kandidatit socialist Edison Memolla ishte bindëse, me 1752 vota diferencë, ndryshe nga zgjedhjet e 14 majit ku rezultati ishte shumë i ngushtë.
Dënimet individuale
- Limon Shala, Fatmir Thaçi, Engjëll Cara dhe Florant Saraçi
U dënuan secili fillimisht me 1 vit e 6 muaj burg, por pas uljes 1/3 të dënimit, u lanë me 1 vit burg, i pezulluar, dhe u vendosën në provë për 2 vite. - Shkëlqim Hoxha
U shpall fajtor për veprën penale “Moskallëzimi i krimit”, u dënua me 4 muaj burg, dënim që u zëvendësua me 60 orë punë në interes publik, për t’u kryer brenda 6 muajve.
Të gjithë të dënuarit janë të detyruar të mbajnë kontakte me Shërbimin e Provës, ndërsa shpenzimet procedurale u ngarkohen solidarisht.
Mesazh për zgjedhjet
Vendimi i GJKKO-së konsiderohet një nga rastet më të qarta të ndëshkimit penal për manipulim zgjedhor, duke vendosur një precedent për përgjegjësinë penale të kandidatëve dhe strukturave politike që tentojnë të blejnë votën.
