Një ngjarje tronditëse ka ndodhur në Mosman Park, një zonë e qetë rezidenciale pranë qytetit të Perth-it në Australi, ku një familje me katër anëtarë u gjet e pajetë brenda banesës së saj. Viktima janë dy prindërit dhe dy djemtë e tyre adoleshentë, të diagnostikuar me autizëm të rëndë.
Policia u njoftua pasi në derën e shtëpisë ishte lënë një mesazh paralajmërues me fjalët: “Mos hyni. Thërrisni policinë.” Kur forcat e rendit mbërritën në vendngjarje, gjetën trupat e prindërve dhe të dy fëmijëve, si edhe kafshët shtëpiake të familjes.
Sipas autoriteteve, prindërit kishin lënë një letër shpjeguese ku flitej për vendimin e tyre dhe për mënyrën se si duhej administruar pasuria familjare pas vdekjes. Hetimet paraprake sugjerojnë se ngjarja ishte e planifikuar, ndërsa policia po vijon verifikimet për të sqaruar plotësisht rrethanat.
Dy djemtë, 16 dhe 14 vjeç, kishin nevojë për kujdes të vazhdueshëm për shkak të formës së rëndë të autizmit, çka sipas burimeve lokale kishte sjellë një barrë të madhe emocionale dhe fizike për familjen.
Ngjarja ka tronditur thellë komunitetin lokal dhe ka rihapur debatin mbi mungesën e mbështetjes institucionale për familjet që kujdesen për fëmijë me aftësi të kufizuara të rënda. Banorët e zonës e kanë përshkruar familjen si të qetë dhe të tërhequr, pa shenja të dukshme konflikti.
Autoritetet australiane kanë bërë thirrje për më shumë vëmendje ndaj shëndetit mendor dhe për forcimin e shërbimeve mbështetëse për prindërit që përballen çdo ditë me sfida të tilla ekstreme.
