Kreu i Partisë Demokratike, Sali Berisha, ka deklaruar se kryeministri Edi Rama ka vendosur të mos ia heqë imunitetin zëvendëskryeministres Belinda Balluku, duke e cilësuar këtë si një akt të qëllimshëm politik.
Në një deklaratë për mediat, Berisha u shpreh se Rama nuk mund të ndërmarrë një veprim të tillë, pasi sipas tij është i lidhur drejtpërdrejt me Ballukun. “Rama nuk ia heq dot imunitetin Ballukut, sepse është vetë. Është Lubia me pantallona”, u shpreh Berisha.
Sipas tij, kjo situatë tregon se vendimmarrja në qeveri është e bllokuar dhe se kryeministri po mbron me çdo kusht bashkëpunëtorët e tij. Berisha shtoi se përgjegjësia për mbrojtjen e Kushtetutës dhe ligjeve nuk mbetet më te qeveria, por te qytetarët.
Ai theksoi se qytetarët do të shprehin revoltën e tyre më 24 janar, duke e cilësuar këtë si një moment vendimtar për përballjen me, sipas tij, kapjen e shtetit dhe mbrojtjen politike të zyrtarëve të përfshirë në afera.
Deklaratat e Berishës vijnë në një klimë të tensionuar politike, ndërsa çështja e imunitetit të Belinda Ballukut dhe presioni mbi institucionet e drejtësisë vijojnë të jenë në qendër të debatit publik.
