Kryetari i Partisë Demokratike, Sali Berisha, ka hedhur akuza të forta ndaj kryeministrit Edi Rama, duke deklaruar se ai po ushtron presion të hapur për të mbrojtur zëvendëskryeministren Belinda Balluku.
Në një konferencë për mediat, Berisha pretendoi se zhvillimet e fundit brenda qeverisë kanë zbuluar përplasje të forta dhe prapaskena të rënda, ku sipas tij Balluku ka kërkuar largimin e Elisa Spiropalit nga detyra e ministres së Jashtme.
Sipas Berishës, Rama ndodhet në një situatë të paprecedentë varësie politike, duke ushtruar presion publik dhe privat ndaj Gjykatës Kushtetuese për çështjen që lidhet me Ballukun. Ai e cilësoi këtë sjellje si banditeske dhe të rrezikshme për funksionimin e shtetit ligjor.
“Rama po bën gjithçka për të mbrojtur Ballukun, sepse ajo i garanton mbështetje të plotë. Fati politik i kryeministrit, sipas tij, është lidhur drejtpërdrejt me fatin e Ballukut,” u shpreh Berisha.
Kreu i opozitës shtoi se përplasjet brenda qeverisë nuk janë thjesht intriga personale, por tregojnë, sipas tij, fuqinë e madhe që Balluku ka brenda mazhorancës, duke ndikuar drejtpërdrejt në vendimmarrjen e kryeministrit.
Deklaratat vijnë në një klimë të tensionuar politike, ndërsa çështjet që lidhen me figura të larta të qeverisë vijojnë të mbeten në qendër të debatit publik.
