Ekipi i ish-liderit të ndjerë të opozitës ruse, Aleksei Navalny, ka publikuar një hetim ku pretendohet se presidenti rus Vladimir Putin është pronar i një vile luksoze me vlerë mbi 100 milionë euro në Krimenë e pushtuar.
Sipas hetimit, kompleksi ndodhet në Kepin Aya, disa kilometra në jug të Sevastopolit, dhe përfshin dy ndërtesa madhore, një mol privat, plazh artificial me rërë të bardhë dhe një heliport. Ndërtesa kryesore ka rreth 9 mijë metra katrorë sipërfaqe, ndërsa një tjetër pranë detit rreth 5 mijë metra katrorë.
Rezidenca thuhet se ishte ndërtuar fillimisht për ish-presidentin ukrainas Viktor Yanukovych, por pas pushtimit rus të Krimesë në vitin 2014 dhe rrëzimit të tij, prona u sekuestrua nga autoritetet ruse dhe përfundoi në përdorim të Putinit.
Ambientet e brendshme përshkruhen si jashtëzakonisht luksoze: dy suita kryesore nga 240 metra katrorë secila, me banjo private rreth 50 metra katrorë, xhakuzi, shkallë dhe elemente të arta, si dhe vaska luksoze me vlerë dhjetëra mijëra euro. Hetimi pretendon se ka edhe dhoma të dedikuara për Alina Kabaevën dhe dy fëmijët e tyre.
Fotot satelitore tregojnë një skelë private, plazh artificial dhe pistë për helikopterë. Kompleksi përfshin gjithashtu një spital privat me sallë operacioni, pajisje mjekësore moderne, dhomë krioterapie dhe një kinema private me tetë vende.
Sipas ekipit të Navalnyt, financimi i vilës është realizuar përmes një rrjeti oligarkësh pranë Kremlinit, duke përdorur kompani fiktive për të fshehur pronësinë reale.
