Victoria Jones, vajza e aktorit të njohur hollivudian Tommy Lee Jones, u gjet e pajetë të enjten në një hotel luksoz në San Francisko, sipas mediave të huaja.
Ajo ishte 34 vjeç dhe u gjet pa shenja jete pak para orës 03:00 të mëngjesit, sipas orës lokale. Shkaku i vdekjes mbetet ende i panjohur, ndërsa burimet zyrtare bëjnë me dije se deri më tani nuk ka prova që të tregojnë për një akt kriminal. Autoritetet kanë nisur hetimet për të sqaruar rrethanat e ngjarjes.
Victoria ishte vajza e aktorit 79-vjeçar, fitues i çmimit Oscar, dhe e ish-bashkëshortes së tij, Kimberly Clafley. Ish-çifti kanë edhe një djalë tjetër, Austin Jones, 43 vjeç.
34-vjeçarja kishte bërë disa paraqitje të kufizuara në aktrim në moshë të re. Ajo u shfaq për herë të parë në filmin e vitit 2002 “Men in Black II”, ku luante edhe i ati. Më pas, ajo mori pjesë edhe në filmin e vitit 2005 “The Three Burials of Melquiades Estrada”, të drejtuar nga babai i saj, ku luante edhe njerka e saj, Dawn Laurel-Jones.
Familja nuk ka bërë ende një reagim publik, ndërsa pritet që autoritetet të japin më shumë detaje në vijim, pas përfundimit të ekzaminimeve dhe hetimeve përkatëse.
