Politologu Albinot Maloku ka vlerësuar se zgjedhjet e parakohshme parlamentare në Kosovë kanë një rëndësi të veçantë për të ardhmen e vendit, pas muajsh të tërë krizë institucionale dhe bllokade politike.
Në një intervistë televizive, Maloku theksoi se pjesëmarrja e qytetarëve në votime ka peshë të madhe, por vendimtare do të jetë mënyra se si do të përkthehet rezultati në krijimin e institucioneve funksionale dhe të qëndrueshme. Sipas tij, Kosova nuk duhet të përjetojë sërish situata të ngjashme me ato të muajve të fundit, që erdhën si pasojë e mungesës së kompromisit dhe një egocentrizmi politik të theksuar.
Ai kujtoi se në traditën politike të Kosovës, subjekti që del i pari nga zgjedhjet ka pasur zakonisht një qasje më të matur për ndërtimin e koalicioneve, por kjo nuk ndodhi pas zgjedhjeve të 9 shkurtit, çka solli thellimin e krizës institucionale. Sipas Malokut, mungesa e bashkëpunimit dhe kurajos politike për të ecur përpara pati pasoja që ende ndihen sot.
Duke folur për figurën e kryeministrit Albin Kurti, Maloku pranoi se ai ka pasur rol dhe merita në momente të caktuara historike, por shtoi se në rrethanat aktuale nuk po arrin të shtyjë përpara pozicionin e Kosovës në arenën e brendshme dhe ndërkombëtare. Ai vlerësoi se ndërtimi aktual politik nuk po i ofron vendit perspektivën e nevojshme për zhvillim dhe stabilitet.
Në fund, Maloku theksoi se rezultati i këtyre zgjedhjeve është prioritar për t’i dhënë fund bllokadës, për të rikthyer funksionimin normal të institucioneve dhe për t’i hapur Kosovës një perspektivë më të qartë politike, ekonomike dhe ndërkombëtare.
