Ministria e Mbrojtjes ka bërë një apel për të gjitha strukturat qendrore dhe vendore, duke i kërkuar të jenë në gatishmëri për të parandaluar dhe menaxhuar përmbytjet e mundshme, të cilat pritet të shkaktohen nga reshjet intensive të shiut që priten të përfshijnë Shqipërinë më 23 dhjetor.
Sipas raportimit të Shërbimit Meteorologjik Ushtarak dhe IGJEO, reshjet e shiut do të jenë intensive deri shumë intensive në qarqet e Vlorës, Gjirokastrës, Shkodrës, Kukësit dhe Dibrës, ndërsa në zonat e tjera reshjet do të jenë mesatare deri intensive, të shoqëruara me shtrëngata.
Një tjetër shqetësim është ngricat që mund të shfaqen në lartësitë mbi 400 m në Veri, Lindje dhe Juglindje të vendit, ku reshjet do të jenë në formë dëbore, duke shkaktuar mundësi vështirësish në transport.
Ministria e Mbrojtjes ka kërkuar që të gjitha strukturat të ndërmarrin masa parandaluese dhe të jenë të gatshme për të reaguar në kohë ndaj çdo emergjence.
