Ish-ministri i Drejtësisë, Ylli Manjani, ka komentuar me ironi zhvillimet e fundit në Partia Demokratike e Shqipërisë lidhur me garën për kryetar, ku përballë Sali Berisha do të jetë vetëm një kandidate.
Sipas Manjanit, fakti që vetëm mjekja Mereme Sela është lejuar të garojë, ndërsa figura të tjera kritike janë përjashtuar, e bën situatën “qesharake” dhe të paragjykuar që në nisje.
Ai theksoi se Berisha nuk kishte arsye të shmangte garën, pasi sipas tij do të fitonte ndaj çdo kandidati. “Është më e lehtë të thuash ‘i munda pesë kandidatë’ sesa t’i përjashtosh me vendim partie nga gara,” u shpreh Manjani.
Në një deklaratë me nota ironie, ai komentoi edhe kandidaturën e Mereme Selës, duke thënë se “i plotëson kriteret se ka ‘Salën’ brenda”, duke luajtur me mbiemrin e saj dhe lidhjen simbolike me liderin historik të partisë.
Manjani shkoi më tej duke vënë në pikëpyetje vetë ekzistencën e një gare reale në PD, duke theksuar se partia është e lidhur ngushtë me figurën e Berishës.
“Sado që të ndodhë aty, ajo është partia e Sali Berishës dhe, sa të jetë ai gjallë, do të jetë kryetari i saj. Këtu nuk bëhet më fjalë për garë,” deklaroi ai.
Komentet e Manjanit vijnë në një moment tensionesh brenda PD-së, ku procesi për zgjedhjen e kreut është shoqëruar me akuza për mungesë transparence dhe përjashtim të kandidatëve alternativë.
