Greqia ka vendosur të mbështesë Bullgarinë në forcimin e mbrojtjes antibalistike, në një moment kur tensionet në Lindjen e Mesme kanë rritur shqetësimet për sigurinë në rajon.
Lajmi u bë i ditur nga ministri grek i Mbrojtjes pas një bisede telefonike me homologun bullgar, Atanas Zapryanov.
Sipas vendimit të qeverisë greke, një bateri raketash Patriot do të zhvendoset në Greqinë veriore për të ofruar mbrojtje antibalistike për Bullgarinë.
Në kuadër të këtij bashkëpunimi, dy avionë luftarakë F-16 do të vendosen gjithashtu në një bazë ajrore në veri të vendit, me qëllim forcimin e mbrojtjes ajrore në rajon.
Përveç kësaj, dy oficerë të lartë të Forcave Ajrore greke do të dërgohen në qendrën operative të ushtrisë bullgare në Sofje për të koordinuar operacionet dhe bashkëpunimin ushtarak mes dy vendeve.
Ndërkohë, ministri grek i Mbrojtjes pritet të zhvillojë edhe një vizitë në Bullgari për bisedime me homologun e tij mbi sigurinë rajonale.
Athina ka theksuar se këto masa lidhen me zhvillimet e fundit në Lindjen e Mesme dhe me përpjekjet për të garantuar stabilitetin dhe sigurinë në rajon.
