Monika Kryemadhi ka zbuluar detaje mbi gjendjen fizike të Ilir Meta, pas paraqitjes së tij në seancën gjyqësore të fundit, duke theksuar ndryshimet e dukshme në pamje.
Në një intervistë televizive, Kryemadhi u shpreh se Meta është dobësuar ndjeshëm gjatë periudhës së izolimit, duke treguar se kostumi që më parë ishte masa 56, tashmë duhet të jetë 52. Sipas saj, ai është shfaqur “i pagjumë” dhe “i bardhë”, kryesisht për shkak të mungesës së ekspozimit në diell dhe kushteve të izolimit.
Megjithatë, ajo theksoi se pavarësisht ndryshimeve fizike, Meta është në formë të mirë dhe nuk ka ndërprerë stërvitjen. “Nga mendja dhe të shprehurit ishte snajper,” u shpreh Kryemadhi, duke nënvizuar kthjelltësinë dhe forcën e tij në komunikim.
Ajo shtoi se nuk e kishte parë Metën që prej datës 18 mars dhe se pamja e tij në gjyq reflektonte lodhje fizike, por jo dobësi mendore.
Në vijim, Kryemadhi hodhi akuza të forta ndaj procesit gjyqësor, duke e cilësuar atë si politik dhe të iniciuar, sipas saj, nga faktorë ndërkombëtarë dhe drejtësia shqiptare, përfshirë edhe Altin Dumani.
Ajo tregoi gjithashtu për aspektin familjar, duke thënë se fëmijët e Metës e vizitojnë rregullisht një herë në javë, duke i çuar ushqime dhe duke pritur me orë për ta takuar.
Deklaratat e Kryemadhit vijnë në një moment kur procesi ndaj Metës vijon të jetë në qendër të debatit publik dhe politik në vend.
