Seanca paraprake ndaj kryebashkiakut të Tiranës, Erion Veliaj, u shty për në datën 12 dhjetor, ora 09:30, pasi mbrojtja refuzoi të paraqiste parashtrimet.
Avokati Artan Gjermeni deklaroi pas seancës se i pandehuri Veliaj nuk është njohur ende me dosjen, duke argumentuar se kjo e bën të pamundur vijimin e procedurës në këtë fazë. Për këtë arsye, ai kërkoi shtyrjen e seancës, e cila u pranua nga gjykata.
Erion Veliaj ndodhet në paraburgim që prej muajit shkurt, ndërsa ndaj tij rëndojnë disa akuza të rënda, përfshirë:
- Pastrim parash
- Mosdeklarim të pasurisë
- Korrupsion pasiv në 9 episode
- Shpërdorim detyre
- Futje të sendeve të ndaluara në qeli
Ndërkohë, zhvillimet gjyqësore lidhur me pozicionin e tij institucional kanë qenë të vazhdueshme. Më 3 nëntor, Gjykata Kushtetuese i dha të drejtë Veliajt, duke e lënë në detyrë si kryebashkiak dhe duke shfuqizuar vendimin e qeverisë për shkarkimin, si edhe dekretin e Presidentit për shpalljen e zgjedhjeve në Tiranë.
Më 27 nëntor, Veliaj i është rikthyer sërish Kushtetueses, kësaj here duke kërkuar shfuqizimin e vendimeve të GJKKO-së, Apelit të Posaçëm dhe Gjykatës së Lartë për masën “arrest me burg”.
Seanca e radhës pritet të përcaktojë nëse gjykata do të kalojë çështjen për gjykim apo do të vendosë ndonjë masë tjetër procedurale, pasi palët të jenë njohur plotësisht me materialet hetimore.
