Kryetari i Partisë Mundësia, Agron Shehaj, ka publikuar dokumente që, sipas tij, pasqyrojnë të dhënat mbi pronat dhe investimet e tij në Itali, duke deklaruar se synon të ofrojë transparencë të plotë mbi pasurinë e tij.
Në një deklaratë publike, Shehaj tha se një prej pronave të tij është blerë në vitin 2019 për 2.9 milionë euro dhe se më pas është rindërtuar pas marrjes së lejes përkatëse, me një investim shtesë prej rreth 4 milionë eurosh. Sipas tij, prona është shitur në vitin 2025 për 15 milionë euro dhe të gjitha transaksionet janë deklaruar pranë autoriteteve kompetente.
Shehaj publikoi gjithashtu informacione edhe për një tjetër pronë në Itali, për të cilën deklaroi se është blerë për 10 milionë euro dhe se synon ta zhvillojë më tej si investim. Ai theksoi se të gjitha investimet e tij janë dokumentuar dhe kryer në përputhje me legjislacionin italian.
Në reagimin e tij, kreu i Partisë Mundësia hodhi poshtë akuzat e ngritura nga përfaqësues të mazhorancës, duke i cilësuar ato si të pabazuara. Ai sfidoi gjithashtu kryeministrin Edi Rama të bëjë publike dokumentacionin lidhur me ndërtimin e banesës së tij në Surrel, duke ngritur pikëpyetje mbi koston e deklaruar të investimit.
Shehaj deklaroi se do të vijojë të publikojë dokumente që, sipas tij, mbështesin pretendimet e tij dhe se nuk do të tërhiqet nga denoncimet ndaj qeverisë.
Deri në publikimin e këtij materiali, nuk ka pasur një reagim nga Kryeministria ose nga përfaqësuesit e Partisë Socialiste lidhur me deklaratat e Agron Shehajt. Pretendimet dhe akuzat e paraqitura nga palët përfaqësojnë qëndrimet e tyre dhe nuk janë verifikuar nga institucione kompetente.
