Publicisti Ylli Dylgjeri ka reaguar me tone të forta ironike ndaj një deklarate të kryeministrit Edi Rama lidhur me Mirlinda Karçanajn, e cila ndodhet aktualisht në arrest shtëpie.
Dylgjeri citon fjalët e Ramës, sipas të cilit Karçanaj jeton në një banesë me qira dhe është “protagoniste e digjitalizimit”, duke theksuar se kjo deklaratë e ka tronditur emocionalisht dhe i ka nxitur atë që e quan një “dëshirë humane”.
Në mënyrë sarkastike, ai shprehet se është i gatshëm ta marrë Karçanajn në shtëpinë e tij, pa qira, duke e krahasuar situatën me raste të tjera të përmendura në debatin publik. Dylgjeri vijon ironinë duke nënvizuar kontributin e saj në digjitalizim dhe duke e quajtur këtë qëndrim si shprehje të “humanizmit maksimal”.
Reagimi i plotë i Ylli Dylgjerit:
“Kërkohet solidaritet!
Rama: Mirlinda Karçanaj sot rri në ‘arrest shtëpie’ në banesë me qira, është protagoniste e digjitalizimit!
U drodha i tëri kur e dëgjova këtë deklarim të Kryeministrit…
Dhe menjëherë më lindi dëshira humane: ta marr në shtëpinë time pa qira!
Thashë: Po Entoni më i mirë se unë është që e mori Parashqevinë?
Po do ta marr!
Mirlinda na digjitalizoftë, na dhe Diellën, që ju bëfsha kurban!
Ka humanizmin tim maksimal.”
Reagimi i Dylgjerit është interpretuar si një kritikë e drejtpërdrejtë ndaj mënyrës se si kryeministri trajton publikisht çështje të ndjeshme që lidhen me drejtësinë dhe figurat nën hetim.
