Partia Demokratike ka reaguar ashpër pas arrestimit të Arta Dollanit, drejtoreshë e Agjencisë Kombëtare të Arsimit Parauniversitar, duke e cilësuar ngjarjen si një tjetër skandal të rëndë të qeverisjes aktuale. Në një deklaratë për mediat, drejtuesja e Departamentit të Arsimit në PD, Lili Sula, tha se arrestimi i kreut të arsimit parauniversitar është një ngjarje e zezë për mësuesit, nxënësit dhe gjithë shoqërinë shqiptare.
Sipas Sulës, rasti i Dollanit është dëshmi e qartë e fenomenit të “partisë-shtet”, që sipas opozitës ka degraduar institucionet për 13 vite me radhë, duke promovuar njerëz pa integritet dhe pa lidhje me fushat që drejtojnë. Ajo deklaroi se Dollani u ngjit në poste të larta falë mbështetjes politike, pavarësisht hetimeve dhe akuzave të mëparshme për shpërdorim detyre.
PD akuzon se gjatë drejtimit të institucioneve publike, Dollani ka qenë e përfshirë në vendime të debatueshme, ndërsa në krye të arsimit parauniversitar ka zbatuar standarde të dyfishta, duke ushtruar presion ndaj stafit, ndërkohë që vetë, sipas pretendimeve, mungonte shpesh në punë.
Sula theksoi se arrestimi i Dollanit, i lidhur me çështjen e kontrabandës së mbetjeve të rrezikshme, është tronditës për sistemin arsimor dhe për modelin që u transmetohet brezave të rinj. Sipas saj, kjo tregon rrënimin e plotë të institucioneve dhe mungesën e përgjegjshmërisë në qeverisje.
Në përfundim, Partia Demokratike u bëri thirrje qytetarëve që t’i bashkohen protestës kombëtare të 10 shkurtit, duke theksuar se korrupsioni, keqqeverisja dhe degradimi institucional prekin të gjithë shoqërinë, pa dallim bindjeje politike.
