Greqia është gjunjëzuar nga moti i keq. Stuhia “Byron”, që po godet vendin prej orësh, ka sjellë shira të rrëmbyeshëm, erëra të forta, përmbytje dhe rrëshqitje dherash në disa rajone, duke vënë në alarm qytetarët dhe autoritetet.
Reshje të dendura shiu dhe rrëshqitje toke janë regjistruar në Lakoni, përmbytje të mëdha në Zakynthos, ndërsa mesazhe alarmi janë dërguar në Mani, Pieria dhe Evrota. Edhe Atika është goditur nga stuhi të forta, ndërkohë që nëntë rajone, përfshirë kryeqytetin, ndodhen në gatishmëri të lartë.
Në Zakynthos, rrugët dhe fushat janë nën ujë. Rruga provinciale Zakynthos–Alykes është mbyllur pjesërisht për shkak të dëmeve, ndërsa probleme janë shënuar edhe pranë fshatit Koukesi dhe në Lithakia, ku kanë ndodhur rrëshqitje dherash. Situata është veçanërisht e rëndë në fshatin Platanos në Gytheio, zonë për të cilën u dërgua mesazh emergjent nga numri 112.
Banorët flasin për një “katastrofë biblike”. Shtëpi, toka të mbjella, makina, kafshë dhe makineri bujqësore janë zhytur në ujë. Shumë familje, kryesisht të moshuar, janë detyruar të ngjiten në katet e sipërme të banesave për të shpëtuar jetën, ndërsa presin ekipet e shpëtimit të mbërrijnë me varka. Mungesa e energjisë elektrike, e ujit dhe e mjeteve të komunikimit i ka izoluar tërësisht disa fshatra, raportojnë mediat lokale.
Vështirësi të mëdha janë shënuar edhe në Lindos, në Rodos, ku janë regjistruar përmbytje dhe është vendosur që shkollat të mbyllen. Për shkak të motit ekstrem, autoritetet greke kanë vendosur që ditën e premte, më 5 dhjetor, shkollat në zonat më të prekura të mos hapen, si masë parandaluese për mbrojtjen e nxënësve dhe stafit arsimor.
Sipas Buletinit të Emergjencës së Fenomeneve të Rrezikshme të Motit të Shërbimit Kombëtar Meteorologjik, moti i keq pritet të zgjasë deri në orët e para të së shtunës, më 6 dhjetor, ndërsa Komiteti i Vlerësimit të Rrezikut do të mblidhet sërish për të vlerësuar ecurinë e situatës.
Në Katerini, shkollat e të dy niveleve të arsimit në të gjitha njësitë bashkiake (Katerini, Petra, Pieria, Paralia, Korinos, Elafina) do të qëndrojnë të mbyllura të premten, për shkak të kushteve ekstreme të motit. I njëjti vendim është marrë edhe në Santorini, ku era e fortë, reshjet intensive dhe rreziqet në trafik kanë detyruar Bashkinë e Thirës të pezullojë mësimin në të gjitha nivelet arsimore.
Edhe në ishujt Tilos, Kastelorizo dhe Symi janë regjistruar stuhi të fuqishme dhe përmbytje, ndërsa shkollat do të mbyllen si masë sigurie. Moti i keq ka goditur gjithashtu Kretën, ku sidomos në Heraklion janë shënuar probleme të shumta në infrastrukturë dhe lëvizjen e qytetarëve.
Fenomenet më të rënda atmosferike priten në Maqedoninë Qendrore, Thesali dhe Sporadet, Atikën lindore, Evia, Peloponezin lindor e jugor, Cikladet, Kretën, ishujt e Egjeut Lindor dhe Dodekanezin. Një paralajmërim i kuq për fenomene të rrezikshme është në fuqi për Pierian, Imatian, Halkidikinë, Selanikun, Thesalinë, Sporadet, Eviën, ishujt e Egjeut Lindor dhe Dodekanezin, ndërsa autoritetet u bëjnë thirrje qytetarëve të kufizojnë lëvizjet dhe të ndjekin udhëzimet e mbrojtjes civile.
