Një tjetër përplasje institucionale ka shpërthyer mes Prokurorisë së Posaçme (SPAK) dhe mazhorancës socialiste, pas refuzimit të SPAK për të pritur një vizitë “monitoruese” nga Komisioni Parlamentar për Nismat Qytetare, Bashkëpunimin dhe Mbikëqyrjen Institucionale, i drejtuar nga deputeti Fatmir Xhafaj.
Sipas burimeve zyrtare, SPAK ka mbajtur një qëndrim të prerë, duke e konsideruar nismën si të papajtueshme me pavarësinë kushtetuese të institucionit. Në një përgjigje drejtuar Kuvendit, Prokuroria e Posaçme ka theksuar se raportimi institucional realizohet në përputhje me Kushtetutën dhe ligjet organike në fuqi, duke nënvizuar se nuk mund t’i nënshtrohet praktikave që cenojnë autonominë funksionale të saj.
Në draft-kalendarin e miratuar më 12 shkurt 2026, komisioni i drejtuar nga Xhafaj ka parashikuar vazhdimin e kontakteve me institucionet e drejtësisë, përfshirë SPAK-un. Megjithatë, sipas burimeve pranë prokurorisë, qëndrimi i institucionit nuk ka ndryshuar dhe vizitat e karakterit monitorues nuk konsiderohen të pranueshme.
SPAK argumenton se çdo përpjekje për mbikëqyrje jashtë kornizës ligjore përbën cenim të drejtpërdrejtë të pavarësisë së organit të akuzës, e cila është kusht themelor për garantimin e hetimeve të paanshme dhe efikase.
Kjo nuk është hera e parë që komisioni parlamentar përballet me refuzim nga institucionet e drejtësisë. Edhe gjatë nismës së mëparshme, disa organe si Gjykata Kushtetuese, Gjykata e Lartë dhe vetë SPAK kishin shprehur rezerva ose kishin refuzuar pjesëmarrjen në procese të ngjashme, duke argumentuar konflikt funksional ose mungesë baze ligjore.
Ndërkohë, zhvillimet e fundit vijnë në një moment delikat, kur SPAK po heton çështje të rëndësishme që përfshijnë zyrtarë të lartë të qeverisë. Përplasja aktuale pritet të thellojë debatin mbi kufijtë e mbikëqyrjes parlamentare dhe garantimin e pavarësisë së institucioneve të drejtësisë në vend.
